Psalms 97
Anduane Homogo ibu kiniore kago ogo
1Anduane Homogo ibu kiniore howa handame ho ka.Dindi o ngego í̠na turu holene nga.
Dindi iba dege dombeneha ngamiru tíguabi turu haga bidaba.
2Beraliba arumalame ibu ho mabu bida.
Ibugua wali agali ta nabi karu mana tigabi ngagome haru howa handaya ho haga ka.
3Ira hungu bamba halu puwa
waitigi ho mabu bidaru dai helaga ka.
4Ibugua hari daba migimege lalu
dindi bibahende ngago wá hame helaga ka.
Dindi ngarume uruni hondowa duru laga.
5Anduane Homogo ibu dindi bibahende ngarunaga Anduane ka.
Dindi hari ngarume Anduane Homogonaga deni wagaya do elagadagua
do elai haga nga.
6Hari daliga li karume ibunaga mini tigabiore nga lalu latagi ka.
Hameigini tara tara dindi bibahendeni karume
ibunaga wá taraore harago de handai haga ka.
7Wali agali mbirale dama mitangi bialu gime wabini ngaruhondo bi pupu wiaga karu a
ti mo taga timbuniore holebira.
Gime wabini ngarume Anduane Homogo hondowa bulu paliai holebire.
8Anduane Homogo-o í̠naga mana tigabi hangu ngegome wali agali dabaga kego manda buwa
wali agali Saiononi karubi Yuda dindiha tano dewa wima pedaruha bu karubi
ti bibahendeme í̠hondo turu halu miniha dungulo haga ka.
9Anduane Homogo Hongo Haiheore-o
í̠na dindi bibahende handameho kegoni. b
Í̠ore mini lene daligaorene daliga howa
bi pupu wulenaga gime wabu ngaru bibahende bolangua haihe kegoni.
10Anduane Homogohanda wali agali mana ko ngaru hame nalaga karu
tihondo gubalini ho haga ka.
Ibunaga wali agali karu handayaho haga ka.
Ibugua ti agali ko biaga karunaga giha karia gingila mialu
haru dai biaga ka.
11Anduane Homogonaga wá holeneme wali agali mini tigabi karuni wá hadali haga ka.
Turu holeneme wali agali bayale biaga karu
tinaga bu miniha mo turuho helaga ka.
12Wali agali mini tigabiwi kamiru tí turu ho hadaba.
Tígua Anduane Homogohanda bayale biyarunaga turuho hadaba.
Ngode Datagaliwabe ibu mini baya buruguleore kago
ibugua uruni biyaru mitangi bialu tígua ibuhondo turu halu ka̱i̱ ladaba.
Copyright information for
HUI